Þýskalandsferð: Heiti potturinn Bamberg

Það er búið að vera um 30 stiga hiti hérna í Bamberg alla vikuna. Margir segja að það sé betra en heima því samkvæmt veðurspá og fréttum er búið að vera kalt á Íslandi undanfarna daga. Jarðaförin gekk vel. Komu langflestir ættingjar og var hún Dora kvödd með fallegri athöfn.

Í gær fórum við til ömmu hennar Miriam í föðurætt. Grossmutti eins og við köllum hana er að verða 96 ára enn býr enn ein enn fær húshjálp á morgnanna við erfiðustu verkin. Afi Klaus ákvað að við mundum fara með lest til hennar því Erik hefur aldrei ferðast með lest áður. Fékk hann þá frábæru hugmynd að kaupa Bayern-ticket sem gildir fyrir 5 persónur og kostar bara 27,- €.

Allt í lagi með það enn það er einn hængur á. Það er bara leyfilegt að taka ódýrustu lestirnar með þessum miða svo að ferðin sem tekur venjulega 1 og hálfan með bíl eða 2 tíma með hraðlest tekur 4 og hálfan tíma. Það er að segja allt í allt vorum við 9 tíma í lest í staðinn fyrir 3 tíma í bíl. Vona ég svo sannarlega að Erik sé búinn að fá sig full saddann af lestum því ég er algjörlega búinn að fá nóg af þeim.

Það besta við ferðina var að ég komst loksins í að lesa bókina Eragon. Ég er búinn að sjá myndina og var ekki hrifinn af henni en lét til leiðast að lesa bókina eftir að hafa fengið margar góðar ábendingar um að hún væri góð. Það má svo sannarlega segja að hún er margfalt betri en myndin. Þó svo mörgum finnist það lúðalegt þá hvet ég alla fantasy aðdáendur sem hafa ekki lesið bókina að lesa hana. Er bráðskemmtileg afþreying.

Nú er bara vika eftir af fríinu og við erum búin að fara i öll skyldustörfin sem við ætluðum okkur. Nú er bara að njóta lífsins. Hitta vini og kunningja og jafnvel að fara með Erik í Playmobil-landið.